Investimet

IBAS – Mundësi Investimi

Njoftim për Ofertën e Aksioneve

Pas një serie zhvillimesh të suksesshme dhe me një drejtim të qartë drejt rritjes ndërkombëtare, IBAS (Innovative Banking and Attractive Solutions) ka hapur mundësinë për publikun për të investuar në IBAS (Angli). Të gjitha investimet do t’i nënshtrohen një kontrolli të detajuar për prejardhjen dhe ligjshmërinë e fondeve. Të gjitha investimet në IBAS janë subjekt i aprovimeve nga Banka Qendrore e Kosovës.

Shuma e Investimit:
Minimumi: €5,000 | Maksimumi: €5,000,000

I. Rreth IBAS

IBAS është një institucion financiar i licencuar dhe i rregulluar nga Banka Qendrore e Kosovës (BQK).
Themeluar në vitin 2019, IBAS zotëron licenca për:

• Emetimin e parave elektronike
• Transferta kombëtare dhe ndërkombëtare të parave
• Kredidhënie për pagesa
• Shërbime Këshillimi për Investime në instrumente financiare, si aksione, obligacione dhe letra tregtare në tregje financiare të rregulluara dhe të mbikëqyrura.

Aktualisht IBAS i shërben mbi 50,000 klientëve individualë dhe bashkëpunon me më shumë se 2,100 biznese në të gjithë Kosovën. Është institucioni i vetëm financiar që operon jashtë BE-së me qasje direkte në SEPA, duke ofruar IBAN britanez që mundësojnë:

• Transferta të shpejta të parave brenda dhe nga Zona Ekonomike Evropiane (EEA).

II. Zgjerimi i tregjeve

Aktualisht IBAS operon në Republikën e Kosovës dhe synon që produktet dhe zgjidhjet e veta (uike t'i pilotojë në kuartalin e tretë (Q3) të vitit 2026 në Mbretërinë e Bashkuar, duke filluar nga Londra. Për të verifikuar gatishmërinë e tregut para zgjerimit, IBAS ka kontraktuar Ssavanta.com të bëjë një studim të pavarur dhe gjithëpërfshirës.

Rezultatet kryesore konfirmuan një pranueshmëri jashtëzakonisht të lartë të zgjidhjeve unike të IBAS. Gjegjësisht, rezultoi se:

• 82% e bizneseve britanike e gjetën zgjidhjet e pagesave të IBAS si të pranueshme, dhe
• 70% e konsumatorëve britanez deklaruan se do ta përdornin IBAS nëse do të ishte falas, ndërsa 40% e tyre shprehën gatishmëri të paguajnë një tarifë mujore për përdorimin e zgjidhjeve të IBAS.

Bazuar në këto rezultate del se:

• Për bizneset britaneze (5.5 milion kompani aktive), 82% (4.51 milion) do të adoptonin IBAS, duke gjeneruar potencialisht £364 milion të ardhura mujore (€420 milion) ose £4.37 miliard (€5 miliard) në vit.
• Për konsumatorët britanez (55.7 milion të rritur), 40% (22.3 milion) do të paguanin mes £5–£25.50/muaj, që përkthehet në rreth £140 milion në muaj (€162 milion) ose £1.68 miliard (€1.94 miliard) në vit.

Këto shifra konfirmojnë një treg të mundshëm britanik të verifikuar me vlerë mbi £6 miliard (€7 miliard) në vit — para fillimit të fazës së zgjerimit të IBAS në Ballkanin Perëndimor.

III. Vlerësimi dhe Performanca

Sipas IFRS, në vitin 2024 IBAS arriti pikën e mbulimit të kostove (Ang. Break-even point) duke shënuar një normë rritje mesatare vjetore (2022, 2023, dhe 2024) prej mbi 138%. Normë ko që tejkalon performancën e gjigantëve financiarë global e të vlerësuar me miliarda dollarë, siç janë Revolut, Monzo, Starling, N26, Klarna e shumë të tjerë të këtij rangu.

Një kombinim i metodës së rrjedhës së parave të zbritura (DCF) dhe raportit çmim-fitimi (P/E) nxjerr një vlerë të ndërmarrjes prej €16.9 milion për vitin 2025, me rritje të parashikuar të vlerës deri në €1 miliard, para listimit publik në bursën e Londrës apo në Nasdaq, për çka IBAS është duke punuar, intenzivisht.

Ilustrim për investitorët potencial

(Vlerësimi 2025)

Sipas vlerësimit aktual prej €16.9 milion (2025), një investim prej €100,000 korrespondon me rreth 0.5917% pronësi, llogaritur si më poshtë:

€100,000 ÷ €16,900,000 = 0.005917 → 0.5917% e totalit të aksioneve.

IV. Vizioni Afatgjatë

IBAS synon të evoluojë nga një fintech kosovar në një ekosistem financiar dhe bankar tregtar pan-evropian, duke lidhur mbi 3.5 milion konsumatorë dhe 500,000 tregtarë deri në vitin 2029.

V. Qeverisja dhe Përputhshmëria

Të gjitha investimet në IBAS përputhen me standardet etike, profesionale dhe rregullatore, në përputhje të plotë me:

• Rregulloret e Bankës Qendrore të Kosovës (BQK)
• Kërkesat e BE-së për AMLD5 dhe KYC
• Standardet ndërkombëtare të kontabilitetit (IFRS) dhe transparencës

VI. Plani Strategjik (2027–2030 e më tej)

Krahas punës dhe sukseseve të reja ne Kosovës, IBAS është duke punuar në një plan konkret afatmesëm, sipas fazave në vazhdim:

Faza 1 – Mbretëria e Bashkuar (2027–2028)

Objektivi: Të konsolidohet IBAS si markë e besueshme për zgjidhje financiare në Mbretërinë e Bashkuar dhe të sigurojë bazën e fortë të përdoruesve përpara zgjerimit rajonal.

Faza 2 – Zgjerimi në Ballkanin Perëndimor (2028–2029)

Objektivi: Forcimi i pranisë rajonale dhe shfrytëzimi i pagesave ndërkufitare për të mbështetur diasporën dhe zhvillimin e NVM-ve.

Faza 3 – Oferta Publike Fillestare (IPO) (2029)

Objektivi: Të tërhiqen investitorë globalë dhe të financohet cikli i ardhshëm i rritjes përmes suksesit rajonal dhe transparencës.

Faza 4 – Rritja Pan-Evropiane dhe Globale (2030 e më tej)

Objektivi: Të pozicionohet IBAS si qendër fintech pan-evropiane dhe ekosistem financiar ndërkufitar që lidh Evropën me tregjet globale.

VII. Njoftim mbi Rreziqet potenciale

Investimet në një kompani private përmbajnë një nivel të lartë rreziku. Investitorët potencialë duhet të marrin në konsideratë së paku disa nga pikat në vazhdim:

1. Humbja e Kapitalit:
   Investimet në aksione nuk janë të garantuara dhe mund të rezultojnë në humbjen e një pjese ose edhe të gjithë kapitalit të investuar.
2. Rreziku i Likuiditetit:
   Aksionet e IBAS nuk tregtohen publikisht në këtë fazë. Pavarësisht interesimit të madh nga individë për t’u bërë pjesë e IBAS, mund të mos ketë treg ose blerës të menjëhershëm për aksionet tuaja. Shitja mund të jetë e mundur vetëm gjatë raundeve të ardhshme të financimit, transferimeve sekondare të aksioneve, ose pas IPO-së së kompanisë.
3. Zvogëlimi i Pronësisë:
   Raundet e ardhshme të financimit mund të zvogëlojnë përqindjen tuaj të pronësisë, megjithëse pritet që këto raunde të ndodhin në vlerësime më të larta dhe kjo do ta ngit vlerën e gjithmbarshme të aksioneve, e rrjedhimisht edhe aksioneve tuaja.
4. Rreziku i Vlerësimit:
   Vlerësimet e kompanisë bazohen në parashikime financiare dhe supozime të tregut, të cilat mund të ndryshojnë për shkak të faktorëve të jashtëm ose operacionalë.
5. Rreziqe Rregullatore dhe të Tregut:
   Ndryshimet në rregulloret financiare, kushtet makroekonomike ose trendet e tregut mund të ndikojnë në performancën dhe të ardhurat e IBAS e për pasojë edhe të vlerës së përgjithshme.
6. Deklarata Parashikuese:
   Parashikimet financiare dhe vlerësimet e rritjes përfaqësojnë pritshmëri, jo garanci, dhe mund të dallojnë ndjeshëm nga rezultatet përfundimtare.

VIII. Tregime Suksesi dhe Dështimi

Industria globale FinTech përbën sot një nga sektorët më dinamikë dhe më fitimprurës në botë. Në dekadën e fundit, ajo ka nxjerrë kompani që kanë shumëfishuar vlerën e investimeve fillestare dhe kanë transformuar mënyrën se si njerëzit menaxhojnë financat e tyre. Disa prej historive më të mëdha të suksesit përfshijnë:

Stripe, Revolut, PayPal, Nubank, Chime, Klarna, Adyen, Ant Group, Plaid, Rapyd, etj. Këto kompani arritën të ndërtojnë vlera prej miliardash eurosh dhe të shpërblejnë investitorët e hershëm me kthime që tejkalojnë çdo sektor tradicional. Faktorët e përbashkët të suksesit të tyre ishin inovacioni i vazhdueshëm, siguria, përputhshmëria me rregulloret ndërkombëtare dhe besimi i klientëve.
Këto tregime suksesi dëshmojnë se me një strategji të qartë, strukturë të qëndrueshme dhe vizion afatgjatë, investimet në FinTech mund të kthehen në pasuri të qëndrueshme me ndikim global.

Megjithatë, historia e FinTech përmban edhe mësime të vlefshme nga dështimet. Shumë startup-e që filluan me entuziazëm nuk arritën të mbijetojnë për shkak të mungesës së kontrollit financiar, menaxhimit të dobët të rrezikut apo sfidave rregullatore. Disa prej shembujve më të njohur janë: Synapse Financial Technologies, Wonga, Ezubao, Frank, Upgrade, Katerra Finance, LendUp, Behalf, Monedo, Simple Bank , etj.
Këto kompani dështuan për shkak të mungesës së bazës operacionale të fortë, transparencës dhe përputhshmërisë, duke dëshmuar se rritja e shpejtë pa kontroll mund të çojë në humbje të konsiderueshme të kapitalit.

Duke i ditur këto, IBAS në vazhdimësi avancon proceset dhe pikërisht kjo ka qenë një ndër arsyet që IBAS ka kontraktuar Savanta.com për të realizuar një hulumtim të thellë e të pavarur të tregut dhe zgjidhjeve të IBAS. Megjithate, investitorët potencial duhet ta kenë parasysh se kjo nuk përbën garanci.

Nëse dëshironi të investoni, plotësoni formularin në vazhdim dhe personeli ynë do t’iu kontaktojë, sapo ta pranojë atë.